فى الغرب، عندهم تقليد فى راس السنة اسمه “قرارات السنة الجديدة”.
معظم الناس بتقرر بس بعد كدة اللى بيحصل إنهم مش بينفذوها، يعنى اللى بيشرب سجاير هيفضل يشرب وممكن يبطل فى نص السنة عادى، واللى عايز يقرا أكتر هيقرا، واللى عايز يسافر هيسافر،عشان كدة نبدأ السنة بنية صافية وقلب نظيف ونقرر هنعمل إيه فى سنتنا دى.
عندى شوية اقتراحات لنوايا أنا ناوياها وربنا يقدركم ويقدرنى عليها.. أول حاجة صفوا النية كدة إن اللى جاى بتعملوه لوجه الله تعالى يعنى كل يوم الصبح تصحى وتقول يا رب اليوم دا انا هاتقيك أكتر.
انووا كدة إن قلوبكم تبقى نظيفة من أى غِل أو حقد أو غضب أو أى حاجة تاخد مساحة على الفاضى.. انووا إنكم تبعدوا عن الناس الغلاوية اللى بتقعد تسخن وتنفخ فى النار الناس دى هتولع لكم الدنيا وحتحول حياتكم لمجموعة حرايق ما بتخلصش.
خليكم مع اللى بيحبوكم وبتحبوهم.. ودول بقى ادوهم على قد ما تقدروا.. بلاش تقعدوها تحسبوها هى ادتني إيه أو هو فأنا أديه أو أديها إيه..على فكرة كل ما تدوا أكتر ومن غير مصلحة أو حسابات كل ما هتاخدوا أكتر.. مش لازم من اللى بتدوله لأننا أكيد ساعات بندى ناس ما تستاهلش بس هتترد لكم وترجع لكم مهما طال الزمن.
مع الوقت هتكتشف جمال العطاء… لما كنت طفلة وكنت بسمع الجملة دى مكنتش بفهمها وكنت متخيلة إن العطاء يعنى التضحية بالنفس، بس كبرت وفهمت إن الكلمة الحلوة للى بنحبهم عطاء، إنك ما تستخسرش تقول لحد إنك بتحبه.
عيش اللحظة أيوة، مش اليوم، لأنك ببساطة مش ضامن اللحظة اللى بعدها هيحصل إيه.. الحياة أقصر مما نتخيل والدنيا أكثر تعقيدا من قدراتنا البشرية، عشان كدة ناخدها ببساطة أسهل بدل ما نتعقد احنا، وكفاية كل واحد فينا ماشي برزمة مشاكل شايلها على دماغه، ما تخافوش من أى حاجة لأن الخوف هو اللى بيربط الإيدين وبيخليكم لازقين بالكنبة اللى قاعدين عليها، بعدين لما تخافوا من حاجة إنها تحصل يبقى هتحصل، ولما تخافوا إن حاجة نفسكم فيها ما تحصلش يبقى مش هتحصل صدقونى.. تفاءلوا وابتسموا وأقبلوا على الحياة مهما كانت مشاكلكم كتيرة واوعوا تفتكروا أنكم أنتم بس اللى عندكم مشاكل، كل واحد لو بص فى قلب غيره مش هيستحمل اللى فيه.. ما تبصوش لبعض وما تبصوش للصور والمظاهر محدش عارف ظروف التاني إيه.. وبلاش تحسد غيرك لأنك مش عارف أى تمن دفعه عشان يوصل للى هو فيه.
لما تجيلك فرصة تساعد حد ساعده جدا لأن ربنا جايبنا على الأرض عشان نساعد بعض.. اشكر ربنا على كل النعم مهما كانت صغيرة بس كن حريصا على مشاعر غيرك مش لازم تتكلم عن الأكل قدام جائع لو مش متقدرش تديله أكل، وشيل أى جميلة تتعمل لك وردها بأحسن منها.. خليك طيب مفيش أحسن من الطيبة واوعى تصدق اللى يقولك دى ضعف، وخليك حنين مفيش حاجة بتكسب فيها القلوب قد الحنية، وخليك كريم الفلوس بتروح وتيجى والكريم كريم فى كل حاجة، والكرم من شيم الأكابر. خليك بار بأهلك فرضاهم من رضا الله.. الدنيا جناح بعوضة يعنى ولا حاجة، إحنا النهاردة فيها بكرة مش موجودين، ما تموتش نفسك على سلطة أو فلوس لأنك لما تموت مش هتاخد منهم حاجة معاك، هتاخد دعاء يا ليك يا عليك، وبعدين أهم حاجة تصدق قوى إن اللى فات دروس أستفيد منها، وبكرة في إيد ربنا هو اللى هيتصرف فى كل حاجة فيه يعنى قدامك بس النهاردة أو اللحظة دى عيشها بكل نية صافية وحاول تبقى راضى مهما قست عليك الدنيا والله كلنا فينا اللى مكفينا وزيادة.. امشوا بقلوب خفيفة من أى مشاعر سلبية وهتحسوا إن الدنيا ألطف بكتير.. احضنوا حبايبكم عىل قد ما تقدروا حضن الحبايب طاقة سعادة مضمونة، وقولوا لهم إنكم بتحبوهم قوى قولوها لهم كتير، مفيش زى الحب حاجة ممكن تحرك جبال وتشفّى أمراض وتهدى نفوس، وافضلوا قولوا لهم عشان كل حد فينا محتاج يسمع كلمة بحبك دى كتير وسط الحياة اللى مليانة مصالح وتفاهمات اللى احنا عايشينها.. حبوا بعض بجد من جوا قلوبكم لأن الحب موصول بالخالق سبحانه وتعالى والقلب اللى مليان حب يبكون مليان نور بينور البصيرة وبيهون علينا الطريق.
ربنا ينور قلوبكم ويملأها حب.. سنتكم زي نيتكم بإذن الله.
