بقلم :هبه السواح
زمان لما كنت بزعل من حد ضايقني او صدمني فيه.. إلخ كنت بزعل اوي وبشيل جوايا وخصوصآ ان ماليش في ثقافة الإساءه او الإنتقام فزعل علي نفسي اوي لاني عارفه اني ماستحقش التصرف ده فكنت بتعرض لالام عضويه شديده ويمكن ماكنتش بدوق النوم بسبب الالام دي ومافيش علاج كان بيجيب نتيجة وده ناتج عن الالم النفسي الداخلي لان المسار الطبيعي للألم النفسي انه يبدأ يعمل خلل في جميع وظائف الجسم والاحصائيات العالميه اثبتت من زمان مش من قريب ان الامراض العضويه والاكثر منها بشاعه عافنا الله واياكم زي الكانسر وغيره نسبه كبيره جداً سببه العامل النفسي.. ولو لاحظنا ان اغلب الناس لما تتعب عضويا وتعرض نفسها علي مجموعه من الدكاتره ويبدأوا ياخدوا علاج دايماً الدكتور تلاقيه يقول ده راجع بردوا لعامل نفسي وتحس ان العلاج مابيجبش نتيجة وده لان التعب الداخلي منبعه الأول كان من الروح يعني نفسي يبقي لازم العلاج يبدأ من جوه الأول عشان العلاج العضوي يجيب نتيجة…
ولما الحقيقه الصادمه اللي مش محتاجه دلائل واجهتها قررت ان اي شخص ليه تأثير سلبي عليا او اي موقف حياتي او تحدي اني بدل مااشيل جوايا واحرق في دمي واشتكي وروحي تتقهر مني ومش بعيد انام ماقومش بسبب لاقدر الله جلطه دماغيه او ساكته قلبيه او شلل في اي عضو من اعضاء الجسم
يبقي لازم اخد بالي كويس واحرص علي نفسيتي وصحتي اللي هسأل عليها يوم القيامه امام الله
ولان محدش هيحس باللي انت اتعرض ليه بسببه.. وبدل ماافضل اعاتب ويمكن عتابي مايجنيش ثماره يبقي اوفر كل المرحله دي..
واعمل stooooop ✋
?اولا علاجك بيبدأ من جوه من جوه اوي يعني لما تنصدم في حد او تزعل او حد يعرضك لأذي ماتعتبهوش وماتقولش ازاي ماعتبهوش مش الغلاوه بتقول اعاتبه؟ لا حضرتك المفروض لو انت عزيز عليه وبيخاف الله فيك مش هيفكر انه يأذيك ولو حصل منه هيبادر بكل جهده انه يصلح اللي حصل منه عشان صحتك تهمه ونفسيتك وخصوصآ لو كان عارف انك مريت بتعب كتير قبل كده ومش ناقص
?ثانياً سامحه بس علم عليه (ازاي اسامحه واعلم عليه؟) هقولك وقتها عمرك ماهتحس بالسلام والاستقرار الداخلي اللي لما تشبع روحك بالتسامح وانك قادر تسامح لكن مش معني انك تسامحه انه هيرجع ياخد مكانته في حياتك زي الأول هتعامله معامله سطحيه حسنه المعامله اللي دينك قال عليها “
الامام علي ابن ابي طالب قال اعتزل مايؤذيك يعني انت مش مضطر ابداً تتحمل فوق طاقتك او تجي علي نفسيتك عشان حد هو نفسه مش فارق معاه تكون بخير ولا لا “يعني فوق لنفسك”
ولازم تبدأ تتعلم مهاره الثبات الإنفعالي لانها هتفيدك جداً في تخطي التحديات وتخليك تفكر بشكل اهدي وتقرر صح..
الخوف والهلع والتردد والقلق اللي النفس البشريه بقت عايشه عليه وروحها بتتغذي عليه بسبب العوامل الخارجيه السلبيه اللي بسهوله جداً بسيطر عليها فلو مش عارف تفرق بين الناس الكويسه من الوحشه او السلبي من الإيجابي علي الاقل اتعلم ازاي تحمي نفسك من السم الخفي اللي جوه كل عامل خارجي لو اتعرضت ليه واللي قولتهم من شويه فوق ? “سامح + علم عليه “
دكتور ابراهيم الفقي رحمه الله قال جمله حلوه اوي
“سامح اعدائك لكن اياك ان تنسي اسمائهم”
انت في غني كل الغني عن مرض لعين تصاب بيه بسبب زعلك من حد او حزنك علي نفسك انك كنت تستحق افضل من كده
يبقي احمد ربنا علي نعمة العلم والوعي والدين اللي بيوجهوك تعمل ايه، ماتزعلش ودرب نفسك علي حياة صحيه انت في امس الحاجه ليها عشان لو روحك تعبت منك مش هتعرف حتي تعبد ربنا صح.
أوصيك ونفسي..
مدرب العلـاقات الـإنســانيه
والتطوير الذاتي
“هبــــــ?ــــــــه الســواح”
