بقلم الكاتب الصحفي مصطفى كامل سيف الدين
تعرف تفرح.. تعرف تضحك وتبتسم..
تعرف تفهم أنك عايش وأنك شخص حر ودول لوحدهم نعمة كبيرة قوى
طب تعرف تفهم أنك شخص غنى حتى لو ممعكش فلوس بس أكيد معاك حاجة غيرك اللى معاه فلوس ومش معاه الميزة بتاعتك محتاجك
و أكيد هيضطر فى يوم ييجى يطلب منك تساعده بالميزة اللى عندك فيديك الفلوس الى بتطلبها !!
فأفرح لأنك شخص ملك نفسك فى الدنيا واللى عايز تعمله بتعمله والمكان اللى عايز تروحه بتروحه ودى لوحدها نعمه كبيرة جدا
طيب ممكن أيه تانى يفرحك ؟؟!!
أقولك يا سيدى أفرح لأنك اللى بتفكر فيه وبتخطط له ممكن تحققه حتى لو بعد فتره طويله
افرح لأنك عايش وبتتنفس.. افرح إن فى عندك شغل كل يوم بتروحه وفى شركة شغلها هيقف من غيرك
افرح إنك بتحب وبتتحب من البنوتة اللى نفسك تتجوزها ولا حتى من صحابك اللى حواليك
افرح لو عندك أب أو أم أو لو الاتنين موجودين فى حياتك فيا سلام على النعمة والفرحة
افرح لو عندك زوجه صالحه بتراعى ربنا فيك وفى أولادك وعملالك البيت والأسرة اللى حلمت ياما بيها
أفرح حتى لو بتتخانق مع اللى حواليك لأن الخناق فيه حياة وبيخلق نوع جديد من كسر الروتين اليومى
افرح حتى لو طلعت على المعاش وافهم إن الحياة مش بس شغل وشقى وإنك مش معنى إنك سبت الخدمة فى الشغل فأنت انتهيت، ممكن تبقى دى بداية مرحلة جديدة جداً فى حياتك من سفر واستمتاع بحياتك، أو حتى مرحلة جديدة فى حياتك العملية من أنك تبدأ مشروع جديد
افرح لأنك عندك حتى لو شخص واحد بيسأل عليك ويزورك وافهم أنك غالى عنده
افرح وافهم أن النعم مش فلوس وبس وأن الفرحة مش أنك تشترى وتبعزق، والله الفرحة فيها أشكال كتير بس إحنا اللى مش واخدين بالنا وبأقل فلوس ممكن نفرح وننبسط ونبقى مية فل وعشرة
متخليش الشيطان يضحك عليك ويفهمك أنك إنسان مكلش قيمة وإن مفيش فى حياتك حاجة تفرح وإن الحاجة الناقصة اللى عندك هى دى اللى لو اتحققت هتفرح صدقنى لا.. صدقنى فرحتك فى سعيك فى الدنيا ورضاك بالى مكتوب واللى معاك ..
فاسمعها نصيحة منى دور جوه حياتك وجوه حواديتك وجوه قلبك هتلاقى اللى يفرحك
لأن صدقنى اللى هيفرحك بجد هو كل الحاجات الحلوة اللى حواليك مش الى جوه جيبك ..
فأفرح بالى معاك.
