مش عيب ابدا انك تبدأ من الصفر في حاجة انت بتحبها.. المهم انك تبدا وتلاقي نفسك..في ناس بتعيش عمرها كلها بتدور علي نفسها ومبتلاقيهاش ..لو لقتها اوعي تسبها وامسك فيها وعافر لاخر نفس فيك .. حتي لو محققتش هدفك بس هتبقي سعيت له وحاربت عشانه ، عشت عشانه ، ومت وانت بتحاول فيه .. هتعلم اولادك او طلابك او جيل بعدك سبت اثر فيه انه يفضل يحاول طول مافيه نَفَس وعايش وقلبه بينبض .. هتعلمه ازاي نثق في ربنا حتي لو اتمنعت كل الاسباب.
صدق قلبك، صدق احساسك ، متبصش وراك.. متبصش علي حد بيكرهك وتقول بيكرهني ليه.. خلي عينيك علي اللي بيحبك وبيدعمك ، خلي احساسك يسمو به ويرتقي .. شوف نفسك في عينيه هتلاقيها حلوه وهتحس نفسك سوبر مان
خلي عندك يقين في الله.. انتبه لأشارات ربنا ورسايله اللي بين السطور في يومياتنا وحياتنا كلها.. هتلاقي في كل كلمه بتتقال في يومك رساله ..بس انت تفهمها وتنتبه ليها.
لو عرفت انت بتحب ايه اسعي اليه..حبك له هيقودك ويرشدك ويقربك منه .. خلي حواليك ناس بتحبك علي الاقل ظاهرهم ليك كده ، سيب باطنهم دة علي الله بس ..هو هيحاسب علي اللي متعرفهوش ومتحاولش تعرفه ، لو كان خير وربنا عايزك تعرفه هتعرفه فمتدورش .
ابعد اي طاقه سلبية او ناس بتحبطك وتشدك لتحت .. سد ودانك عن الضعف .. وقول لنفسك ليه مااحاولش ..حتي لو موصلتش بس ابقي حاولت وحاولت وحاولت .. عاااافر .
كل ماتقع قوم ، كل ماتعمل ذنب استغفر وقاوم ، علي ربنا مافيش حاجه اسمها مستحيل ..في صعب بأذنه هو وبس هيبقي سهل. مافيش ضرر الا بأذنه ، مافيش خير الا باذنه.
قربله هتلاقي كل حاجة حلوه بتقربلك ..والعكس صحيح.
حب نفسك واكرمها وعزها وارفق بيها وخد بايدها لو وقعت او غلطت وصلحها ، قَوّمها.. محدش اتولد احمد زويل ..
لكن في حد اتولد وحاول وعافر لحد مابقي زي احمد زويل.
واي توفيق واي حاجه حلوه بتوصلها وطي واسجد واشكر ربنا عليها ..متتغرش بنفسك لان نفسك مِلكُه ..بإيده يعزها ويطلعها لفوق جدا والعكس . توفيقنا به أولا وأخيرا مش بس بمجهودنا.
خليه في قلبك وحارب متخفش .اسند عليه.
سيب أثر طيب وضحكة علي وشوش بعد رحيلك عن الدنيا كلها يفتكروك بيهم. وقلبهم قبل لسانهم ينطق بدعوه ليك هتبقي محتاجلها .
لو قادر تساعد حد ساعد، لو قادر تفرح حد فرحه، اجبر بخاطر الناس .. لو قادر تأذي حد حتي لو أذاك متأذهوش..
وكل ربنا بس واقعد هادي واتفرج.
خليك أمل ونور بنقاء في زمن ساده السواد والنفاق واليأس..خليك ضحكة ، ومَثَل طيب لما حد يشوفه ويتعامل معاه يقول لسه في ناس طيبة.
ثق ان الطيبه مش هبل ولا غباء .. ربنا بيحب الطيبين..
ثق في ذكاءك وتفكيرك ونَفسَك.واكرمها.. اعرف ان ذكاه القلوب وجعها..
ان حزنك او وجعك ذكاه لقلوبنا واختبار من ربنا لينا ورحمه منه وتربيه وحب .. بيعلمنا ويقومنا ويفتح ذهننا .
خليك عارف انك عمرك ماهتعرف او تحس بطعم الحلو الا لو دُقت المر..ابّني من كل وجع حسيت به طوبه ثابته ودوس عليها واطلع فوقها خطوه .. مدام ممتش منه يبقي ربنا بيعلمك.. اجمع طوبك واعمله حيطه خليها سد بينك وبين اي ماضي وحش او احساس محبتوش او ضعف او قهره او ظلم او حزن او فشل.. وعديه وابدا .
ادعي ربنا بكل مستحيل نفسك فيه.. وطبطب علي قلوب الناس.. هتُجبر.
