أدب وشعر

حلم ضايع…. كلمات الشاعر عمر عبدالعزيز زهيري

حلم ضايع
كلمات الشاعر عمر عبدالعزيز زهيري
“تحيه الي أرواح اولئك البسطاء الذين غالبا ما يتجاهلهم القطار”
 
 
معلش أصلي نسيت أفرح
صاحبنا البهجة أنا وعمري في بداياته
وفجاة أخدها وسبقني
وأنا لسايا في المطرح
 
مع زحمة مواجعنا
بننسي إننا حاسين
 
بندي الدنيا فرحتنا
نبادلها بلقمتنا
 
ونحمد ربنا ونشكر
مادام باتو العيال راضيين
 
تقوم الدنيا تخدعنا
وتاخدها كده ببلاش
 
وتطلب منا صحتنا وقوتنا
عشان مانعيش
 
ونحمد ربنا تاني
نقول ماهو اصله جه في الريش
 
ولما يقل مجهودنا
نبص نشوف ايه اللي بنينا.. بجهودنا
نلاقي مكانا ع البسطة
ما بين الأدوار و في البدروم
 
وحلم قديم فيه الدنيا بمزيكا وفراش بيحوم
 
أتاريني وانا باجري نسيت نفسي
بقيت ذكري لواحد تاني
 
لا شكلي هو ده شكلي
ولا ده سني وزماني
 
نحاول ننسي ونكابر
فنحصد فاكهة معطوبة
 
فاتتنا المانجة في يوليو
و نستناها في طوبة
 
وانكر اني باتحسر
وافضل احن واتامل واستفسر
 
حتدينا الحياة فرصة ؟!
نشوف لون الفرح من تاني؟؟
ولا خلاص؟!
 
وأنا اللي فهمت متأخر؟!

بوابة الشباب نيوز

جاء إطلاق بوابة الشباب نيوز على الانترنت ليكون وسيلة لمعرفة الاخبار اول باول، ويمثل إضافة قوية في الفضاء الالكتروني، وجاءت انطلاقة الموقع من مصر من قلب الاحداث ليهتم بالثورات العربية والمشاكل السياسية ويغطى الفعاليات الاقتصادية والرياضية ويواكب علوم التكنولوجيا ويغطي اخبار المرآة

مقالات ذات صلة

زر الذهاب إلى الأعلى