بقلم هدير الفايز
النسبة لموضوع غادة عبدالرازق حديث الشعب المصرى
اولا : هى كانسان عادى جدا بيستخدم ال instagram و ال whatsapp ,معرضه للموقف دا لو مش عارف ازاى تستخدمهم خصوصا بعد خاصية اللايف اللى موجودة وال story يعنى ممكن اصلا تفتح بالغلط الكاميرا وانت فى الحمام وانت فى اوضة نومك وانت عريان وانت فى اى وضع وتلاقى نفسك لايف فى الوضع دا ، يعنى من الاخر هى ضحيه السوشيال ميديا والتحديثات الجديدة اللى اصلا مبقتش تخلى فى اى خصوصية وممكن بالغلط تقع فيه .
ثانيا هى علشان هى ست وظهرت كدا بالغلط تتحاسب هى وانت كراجل لو ظهرت عريان بالغلط عادى جدا لانك الراجل؟
ثالثا : الناس اللى بتقولك دى كانت سكرانه وان دا غلط وبيحث على الرذيله، مبدائيا انت عرفت منين انها سكرانه , واذا فعلا كانت سكرانه ، انت كانسان عادى جدا ايه الضرر اللى عاد عليك وهى سكرانه ، يعنى هى بتأذيك فى ايه لما تسكر وتشرب ؟ رابعا : اللى بيقولك احنا شعب متتدين بطبعه واخلاق الشعب اللى متقبلش بكدا ، احب اقوله مكانوش فتحوا drinks ولا بارات علشان تبيع الكحوليات وان الشرب دا شى مباح فى مصر على فكرة مش جديدة
خامسا: اللى قدموا بلاغ فيها وبيقولوا انها لازم تتحول للتحقيق علشان بتحس على الرذيلة فى الاكونتات بتاعتها , احب اقول لحضرتك انا دخلت على انستجرام غادة عبد الرازق لما عرفت انها عندها انستجرام ودخلت اتفرج على صورها وحياتها , مبدائيا دى واحدة عايشه حياتها زى اى انسان عادى فى الدنيا بتلف وتسافر وتلبس اكيد بكينى فى البحر مش هتلبس زعبوط العفريت , وبتلبس فساتين وعايشه حياتها ،فين بقى الحث على الرذيلة , ها فيييييين ؟
لو دورت يااستاذ فى اكونتات بنات models مصريات هتلاقيهم على فكرة بالبكينى وبفساتين سواريه والمتابعين بتوعهم من مصر وكل حته فى العالم معنى كدا انهم بيحثوا على الرذيلة ؟؟؟؟؟؟؟
سادسا: الشعب دا اصلا مش محتاج حد يحثه على الرذيلة، كفاية اوى اننا فى المراكز الاولى على مستوى العالم فى التحرش ، يعنى شعب ميتخفش عليه من واحدة زى غادة عبدالرازق انها تتضحك على عقلة وتحثه على الرذيلة
سابعا : فى حاجة اسمها حرية شخصية لاى بنى ادم سواء كان بنى ادم طبيعى او فنان او قاضى او عنده اى مكانه اجتماعيه فهو ليه الحرية الكامله انه يمارس حقوقه وحياته الطبيعيه وانت كبنى ادم اصلا تانى ملكش دعوة هو بيعمل ايه مادام مش بيخالف القانون او بيأذى اى حد
ثامنا : انا مختلفة مع غادة عبد الرازق فى حاجة ، المفروض هى تفهم انها ضحية ومجنى عليها لما يحصلها دا يعنى الطبيعى لو اى حد مكانها مينكرش ويقول دا حد ناشرلى فيديو وان دا مش انا, المفروض تقول الحقيقة ان دا حصل بالغلط عادى جدا والمفروض ترفع دعوة قضائية ضد اللى معاهم الفيديو دا انهم بينشروا لها حاجة كدا وان دا تعدى على حياتها الشخصيه وتشهير بيها يعنى هى اللى معاها الحق مش حضرتك ياللى معاك الفيديو وعاوز تفضحها انا مقدرة جدا انها مصرية وانها بتفكر بدماغ المصريين واول حاجة هتقولها لاء دى مش انا دى فوتو شوب والكلام دا
تاسعا: انا كتبت الكلام دا مع انى عندى اعتراض على شخصيتها وادائها الفنى بس بجد الشعب المصرى اوفر ومتناقض وبيحب الزيطة ، انا عن نفسى دخلت على الانستجرام علشان بس عرفت ان عندها انستجرام ومعجبنيش طريقتها فى كلامها فى فيديوهاتها عن شغلها وعن سفرها لجزر المالديف نظرا لكمية الغرور وان مفيش حد زيها مبيسافرش ، عاوزة بس اقولها ان المالديف ارخص من دبى ولبنان ومن مصر حتى فيعنى انتى مروحتيش رحلة للمريخ مثلا ولو دورت شويه فى اكونتات جيرانها المصريين هتلاقيهم لفوا العالم بردوا فيعنى ياغادة انتى معملتيش جديد يستاهل الغرور دا كله ، وكمان فى حاجة بالنسبة لنجاح المسلسل اللى بتتكلمى عليه فى حاجات كتير اوفر والناس كتبت على الفيس الكلام دا
فاسمعى بردوا لكلام الناس واعرفى ان النجاح مش بالغرور والتطبيل لازم يكون فى انتقاد انا قلت كلامى دا كمواطنه عاديه جدا شافت الاحداث بالصدفة وحبت تقول رايها لانها استفزت من دماغ الشعب الهفتان على الفيديو وتانى هكررها يا استاذه غادة حضرتك ضحيه ومجنى عليكى ومن حقك ترفعى قضيه على اللى عملوا فيكى بلاغ وعلى اللى معاهم الفيديو دا وبيهددوكى به ، ولو اتنشر اوى كدا لازم تردى ان دى غلطة من موبايلك وممكن تحصل لاى بنى ادم طبيعى فى الدنيا , الغلطة مش فيكى ، الغلط فى تفكير شعب مش بيفكر بعقله اصلا ، بيفكر بالنص التحتانى
والسلام عليكم ورحمة الله وبركاته
