بقلم سكرتيرة التحرير سارة مشعل
ياطفلتى
وحشتيني 
واخبارك بقت ازاي ؟
وبتنامي فـى وقت الليل ؟
ولسة الطفلة جواكي
بتتفرج على الكارتون ؟
وفستان الفرح لايق ؟
وبيشدك ساعات اللون ؟
ولساكي على النية ؟
بريئة فـى نظرتك للناس ؟
تأثر فيكي اغنية ؟
وعايشة بمبدأ الاحساس ؟
ولسة معندكيش اصحاب ؟
فلان هيموت ويبقالك
تقولي لصاحبتك فكك ؟
ولسة بتهربي دايماً
من الواقع ومـن الايام ؟
وواخدة بطولة فـى السينما
وفي الفرجة على الافلام ؟
ولسة بتلبسي غامق ؟
وكل ما تيجي تنسيني
بتفتكريني بزيادة ؟
ولسة مكملة نومك
هلاوس بيا كالعادة ؟
ولما بينتهي يومك
تحسي اللقطة متعادة ؟
ولساكي عشان تبكي
بتبقي عاملة قال نايمة ؟
وقال غرقانة جوه النوم
ومش فـى دموعك العايمة
ولسة الكحل فـى رموشك
بيهرب فـى الدموع ويبوش ؟
شفايفك لسة بهتانة ؟
ومش لايقة فـى لون الروج ؟
ولسة الدمعة بتبيت
على خدودك تدفيكي ؟
وتيجي الشمس بتصحي
شعور بايت ومات فيكي ؟
وزي الشمس فـى كسوفك ؟
بتكره تبقى متشافة
ولسة البرد فـى كفوفك ؟
وروحك لسة شفافة ؟
وحشتيني …….
