صالة الانتظار
كلمات الشاعر عمر عبدالعزيز زهيري
كتير باحس بانها صالة انتظار
الكل مستني لساعات
بتطول وتقصر وحد تاني اللي بايديه القرار
فيه ناس بتحلم بالفرح
وناس بتترجي الفرج
والكل مستنيله يوم
احلامه يكسيها الخضار
كل البشر مستنيين
اللي بيضحك واللي ماليه الانين
اللي بيكره واللي دايب مالحنين
كله يقولك اني هارتاح بعد لما..
ولما بتحصل بعد منها لسه لما..
ولما تيجي يبقي نستني للما..
واذا ما جاتشي تتقلب شكوي ومذمه
عشان كده الغربه شايفها مأصله فكل الوشوش
وباحس ان الحظ مهما يوم غازلنا
لسه برضه في الوشوش لمحة عبوس
ولما يترآي لعيونا حلمنا قرب المعاد
ونبتدي نآمن للحظه..فيها نرتاح مالسهاد
فجأه بييجي الدور علينا
وتصبح الاجساد جماد
تقلب الروح عالحياد
وتتملي من تاني الصاله بناس جديده وباحلام جداد
نكتشف ان انتظارنا
خسايرنا او حتي انتصارنا
وانكسارنا
ولا الصراع علي ايه اللي راح وايه اللي جالنا
كل ده كان تسليه
كله كان اصلا هزار
فقلب صالة الانتظار
ايوه دي صالة انتظار.
