كلمات الشاعر عمر عبدالعزيز زهيري
طريق العروبه
وسيد وزوبه
وفرحه خجوله
ودبلة خطوبه
ولمه وهيصه
مشاكل عويصه
بزغروطه تهرب
في نكته لويصا
دي زوبه عروسه
فنظرتها بوسه
وسيد عريس
مشاعره هويس
ببدله قديمه
واحلام عظيمه
ولحظه فرحهم
ككافة حياتهم
فقيره ولئيمه
كاوتشات عريضه
لعربيه بيضا
وسبحه فمرايه
ودعوه بغيضه
ده نواف عسير
بماضي الحصير
بجاجوار يسوقها
ولساه ضرير
وشكله مغاير
غبي ودمه فاير
حفاه رغم انه
سكن في العماير
وبيعدي سيد
في نفس الطريق
بحلمه ببكره
وباقي الفريق
كان نفسه في صوره
وجنبه النافوره
ورمسيس باصصله
يتمتم نشيده
وده اداله ضهره
بيقرا في سوره
وفجاه يفوق
يبص لوراه
وزوبه فحماه
يفكر للحظه
في شوفته لسبحه
أكيد ده قريبه
بيضحك معاه
تصوت فرامل
يتامي وارامل
تسيبهم وراها
وكام كدبه حامل
حصاوي الطريق
وحبة دقيق
وشنطه حريمي
وجزمة رفيق
وماكياج رخيص
وحلم بعريس
وفستان فرحها
وبواقي القميص
تنام عالرصيف
ماهواش نضيف
طريق العروبه
يبان انه غادر
ما يقربلهاش
ولازم تغادر
ما تمشيش معاه
وإنه نجاتها
شفاها وعافيتها
تعدل طريقها
لعكس اتجاه.
