بعشق حاجات
كلمات الشاعر والكاتب عمرعبدالعزيز زهيري
بعشق حاجات
مهيش كتير
طلة دفا
من شمس حانية مولفة
داخلة تطبطب من ورا شباك إزاز
وسط الغيوم وسط المطر والزمهرير
وصوت حرير
غنوة لفيروز او أغاني قديمة جاز
كرسي فوتيه
جرنان معاه سيجارة وكمان فنجان لاتيه
يسحرنا عالم م الشجن والذكريات
بعشق حاجات
نسمة خريف
مرت شهور الحر المطلي بزيف
وطفلة رايحة المدرسة
واخدة معاها عمر لسه بيبتدي
وضفيرة وفيونكة وشنطة كراسات
سابتها قاصدة ولا ناسية
كراس موسيقي ويا علبة ألوانات
بعشق حاجات
لحظة ميلاد
وتحيا مصر في مدرسة بصوت الولاد
ساعة الشروق
وحوار بذوق
عن شعب طيب مستكين
وحلم إنه يجيله يوم يصحي يفوق
وأذان بيعلي إن العمل خير م السبات
حي علي بلادنا وحي علي العباد
حي علي الحاضر وبكرة
الماضي فات … الماضي مات
بعشق حاجات
ساعة الفطار
عيلة ولقمة مغمسة بحلم النهار
سينما وكتاب
ضحكة عجوز
نظرة رضا في عين فقير
ولقا السرير
لمة صحابي مهما طالت بالساعات
بعشق حاجات
كرسي في جنينة … واتنين سوا
بيسرقوا….
لحظات هنا في وسط مشوار الشقا وحياة ضنينة
الشعر شايب والزمن سايب رتوش
عشرة و وفا باينة في عيونهم والوشوش
بعشق حاجات
مهيش كتير
أشياء بسيطة صغيرة
لكن أكيد فيها حاجات متكررة
عند الصغير والكبير
لكن في زحمة يومنا وف جري الساعات
بتضيع حاجات
وتتوه حاجات
وف لحظة نهدي ونفتكر
إن الحياه دي عمرها ما تكون حياة
إلا في لحظة نحسها … ونحبها
هتجيلنا ولا نروحلها
ولا يضيع العمر نحلم باللقا
ومن سكات
نعشق حاجات
