بعد الخريف
كلمات الكاتب والشاعر عمر عبدالعزيز زهيري
متزعليش
لسه الحياه مخبيه لينا حاجات كتير ومدكنه
فيها اكيد اللي بيستاهل الدموع
وبرضه فيها حاجات بتخلق
حتي من نطق الحروف
زغروطه فوق الالسنه
رغم انهيارك اللي باين في البشر والامكنه
رغم القلوب المردودين
رغم العقول المقفولين علي قديم الازمنه
لسايا شايف في الظلام
ورق مفضض ..بالونات..وحاجات كتيره ملونه
حاسبي فخطاكي ما تتوهيش
شكلك صحيح متلخبطه
اصوات كتيره تشد فيكي ولا انتي عارفه
مين اللي واخدك للعويل
ولا اللي آخره لزأططه
خدي قلبي سدي بيه ودانك
وانسي حتي صوت أدانك
متفضفضيش
وحوشيها صرخه مشرنقه
بقي صوتك اللي كان زمان
يشبه لصوت الزأزأه
دلوقتي اهو اصبح بيوجع
عمال يجرح زي وخز الدأدأه
ومتقلقيش
حتي في اوقات الاحتضار وفي الخريف
عالشط تفضل غنوه من ساعة المصيف
هتميزيها
دافيه…صافيه..حنينه
من القلوب متمكنه
تنده تقولك ما تخافيش
ده طريقك اليوم ده ولو مفروش بشوك
مصيره يوم يقلب لريش
غني معاها للزمن وللحياه
مهما يطول البرد برضه راح أعيش
لازم اعيش
ايدي في ايدك ايوه هتعيشي واعيش.
