كلمات الشاعر عمر عبد العزيز زهيري
لما بتيجي تغيب الشمس
امسك دايما
حتي فاخر خيط للنور
تبت فيه اوي اياك يفلت
تخلق منه شعاع مسحور
وسط العتمه
وسط سواد التيه
والضلمه يبقي مابينها وبينك سور
وسط الصحرا القاحله الكالحه
فدادين تتحول لبحور
يبقي الحزن ساعتها قنايه
بتعديها بس بخطوه
والخطوه بترسم ضلايه
ونجمه وورده وصوت عصفور
لما بتضحك
خلي الضحكه ساعتها ولازم تبقي بصوت
خلي الكون يعرف ويشوف انك مبسوط
خلي الكل يحس بحاجه
لما بتزرع في الكون بسمه
بتفيض فرحه اوي وبزياده
حتي ولو جواك ممرور
لما بتيجي تغيب الشمس
يمكن يبقي يومك عدي
بس اكيد انك هتعيشه مش هيفوت
هتعيشه ايام من بكره
وطول مالنور في الروح والقلب
وجواك فكره
عمره ما هيسيبك للضلمه
ومش هتموت
