ثقافه وفننجم الشباب
محمدالدقاق لـ بوابة الشباب نيوز:”هاني سلامة”تنبأ بنجاحي..وحلمي اتحقق بالتمثيل مع”السقا”
حوار :ياسمين عباس
– كيف ترشحت لدورك في مسلسل “الحصان الاسود” ؟
اترشحت للمسلسل عن طريق مخرج العمل “أحمد خالد موسى”.
– ماذا عن اجواء اللوكشين مع النجم “أحمد السقا” ؟
في البداية أنا من الجيل اللي أتربي وشاف وكبر مع أحمد السقا، وكان حلم من ضمن الأحلام إني أشتغل معاه، والحمدلله أصبح حقيقة، كواليسي معاه بجد كانت كلها صداقة وأخوه وأتعلمت منه كتير جداً إنسانياً قبل فنيا،ً الشخص ده أحتضني من أول يوم تصوير.
– ما الذي جذبك لهذا الدور؟
الدور تركيبته جديدة عليا شكلاً ومضمونًا، وكنت محتاجها جداً عشان أثبت إني مش بس الواد الشعبي واللي بيلعب بلطجي، وفكره إني بلعب دور هاكر استفزني فنيًا إني اشتغل على نفسي كتير عشان أقدمه بشكل مختلف سواء في طريقة كلامه، لبسه، وشكله، فأتمني من ربنا إني أكون وفقت فيه، ولازم أشكر المخرج “أحمد خالد موسى” لأنه السبب بعد ربنا في التغيير ده.
– ماذا عن دورك في مسلسل “طاقة نور” ؟
دوري في طاقة نور ” روقة ” أبو نص لسان بحبه جداً، وكان الترشيح من كاستنج ديركتور محمد حجاج، وعملت اوديشن وعجبت استاذ رؤوف عبد العزيز، ومن ثم بقيت أحد عناصر المسلسل.
– كيف كانت شخصية “روقة” مكتوبة على الورق
كان مكتوب بلطجي عادي جداً، بس الحمد لله الواحد بيحب يجتهد ويشتغل ع نفسه استأذنت استاذ “رؤوف” إني اعمل اللدغة في الحروف، وعجبته وظهر الحمدلله بشكل ده.
– ما رأيك في الفنان “هاني سلامة” ؟
“هاني سلامة” نجم بمعني الكلمة، لأني شايف ان الفنان والنجم لازم يكون متواضع، وهو اكتر من كده بحبه علة المستوي الشخصي، والفني جداً، استفدت منه كتير، وله حاجة معايا عمري ما هنساها وانا في مسلسل “نصيبي وقسمتك” كان بينا مشهد تحقيق بعد ما خلصت قام حضني، وقالي انت أجبرتني إني اركز مع شغلك، وتفاصيلك، وانسي نفسي، وهتكون يا “دقاق” من اهم الممثلين اللي جات مصر، وأفتكر كلامي كويس.
– كيف استقبلت ردود الأفعال حول المسلسلات التي قمت ف الاشتراك بها ؟
في نص رمضان كده ابتدت الناس كل ما امشي في الشارع تنادي عليا بأسماء الدورين، وده كان بيفرحني جدا،ً والاحلي والجديد عليا الحمدلله ان الناس ابتدت تحفظ اسمي، وتناديني به فرد الفعل بحمد ربنا كل شوية عليه، ويارب اجتهد واشتغل ع نفسي اكتر عشان افضل عند حسن الناس اللي ابتدت تحبّني دي.
– ما هي اعمالك القادمة ؟
اللي جاي إن شاء الله مسلسل بس مش هقدر اتكلم عنه لحد ما التفاصيل كلها تتم.
