أدب وشعر

صورة ….كلمات الشاعر عمر عبدالعزيز زهيري

كلمات الشاعر عمر عبدالعزيز زهيري

تلف الدنيا تجري تدور ما تتغير ونتغير
يعيشها كل كائن حي لمرة مش بتكرر
دوائر ساحبة أحلامنا وأعمارنا ما نتحير
بداية القصة طفل عنيد بيجري في الخلا بيلعب
بيترجي الحياة غنوة تدور ما تكل ولا تتعب
وطفلة الحلم ماليها من الشباك بتتلصص
وفي عيونهم لقا يلمس علي أحلام بتتفصص
وفرح الدنيا يجمعهم في لعبة في ضحكة ولا حوار
ماهو الغدر اللي متنكر ما نكشفهوش واحنا صغار
براءة مغلفة العالم
هزاره جد في عيونا وجده هزار
براحة للسما السابعة بألوانها بياض في خضار
وفي الشارع بتتشبك إيدين في الرايحة والجاية

يروحو المدرسة وييجوا مايفترقوا ولا في ثانية
حنان يرسم لدنيتهم في صورة خدتها بعينيها
قلمها حبره من قلبه تخط الرسمه بإيديها
وتروي الحلم بوجودها لحد ماتخلص الجامعة
ويبتدي ينكشف عالم عيون شايفة وودان سامعة
وشمس الدنيا بتفتت كيان واحد بقلب برئ
تولع في تفاصيله وبتخلي السكينة حريق

ويظهر للولد عالم فيه المعروض بيتعدد
فراشتة هو دنيتها لكن أفكاره تتجدد
ويبتدي منها يتهرب ويسيبها بدون أسباب
يشوفها الكل من بعده براءة مغلفة بضباب
وتفضل عايشة عالذكري وتتنفس من الصورة
فضل نفس الكيان موجود ولكن رجلة مبتورة
بتتســـند علي طـيفــه وترفض كونه مش هيعود
وتتعامل مع الدنيا كأنه جنبها موجود

وبتدور الحياة بيها وتتعود علي الوحدة
أمومة تربي في عقدة تشوف كل الرجالة جاحدة
ولما تضلم الدنيا لقلب كأنه كسر إزاز
تلاقي النور كده ف بصة لصورة معلقة في برواز

تعدي سنين وبتقرر تسافر لجل ما تهرب
وتاخد حاجة تنسي حاجات لكن فاكرة تاخد صورة
بتهرب منها وياها في لحن لغنوة مكسورة

سنين بتزيد علي غربة وفجأة وهي ماشية في مول
تحس بقلبها بيطب وتتثبت كما أبو الهول
بتلمح عيلة بتقرب وفيها لمحة م الماضي
ده حلم قديم بيتشكل وماشي في الزحام عادي
أمل عايش سنين فيها لا هو بيظهر ولا بيغيب
ملامحه هي حاساها لكن باهتة في جسم غريب
سنانه دايبة من الدخان ماشي مخلع وشكله عجيب
بكرش بصلعة وبتجاعيد زمن حافر في خد في إيد
كهولة من الحياة فارغة بمسحة ضل طفل عنيد
وبصت في عيونه تشوف علامة سايبها حب بعيد
لقيتها عيون كما الصخرة لا بتبربش ولا بتقيد

وجريت والدموع نازلة تبوش حلم عاش فيها
دموع تغسل تعري وهم طول عمره مدفيها
ببصة في مرايات البيت بتشهق تتسند ع الحيط
شافت واحدة متعرفهاش لا عايزة تشوفها ولا حابة
وراحت جري عالصورة عشان جواها تتخبي
وكانت لحظة فيها الشوف ماهوش بالوهم كان له حدود
شافت صورة عيال تانية لا هي فيها موجودة
ولا هو كمان موجود

بوابة الشباب نيوز

جاء إطلاق بوابة الشباب نيوز على الانترنت ليكون وسيلة لمعرفة الاخبار اول باول، ويمثل إضافة قوية في الفضاء الالكتروني، وجاءت انطلاقة الموقع من مصر من قلب الاحداث ليهتم بالثورات العربية والمشاكل السياسية ويغطى الفعاليات الاقتصادية والرياضية ويواكب علوم التكنولوجيا ويغطي اخبار المرآة

مقالات ذات صلة

زر الذهاب إلى الأعلى