أوهام مريحه
كلمات الشاعر عمر عبدالعزيز زهيري
أهو نجرب
نقوم نركع نصوم نفطر وبنقرب
وأكتر منها نلقانا
بنتداري
في أوهام جوه ساكنانا
شجن بيفيض يغطينا ويملانا
ونتوكل … ونترهبن … ونتبتل
أغاني تصادر الفرحة
نرنم فيها ونرتل
اتارينا في مشوارنا
بنبني في حواجزنا
بنعلي بكل أسوارنا
ونغزل وهمنا واحة
نسيب جنة … عرقنا اللي يحققها … لحلم بجنة مرتاحة
ولما ننصحي نتفاجي
بإن العمر متسرب
في مشوارنا … بنتصارع … بنتسلق شجر فارع
ساعات نكسب … ساعات نعلي
وفجأة نبص تحتينا
يضيع الحلم جوانا
تتوه السكة نتضلل
مكاسبنا … بقدرتنا ؟؟!!!
وغيرنا ليه بيتكسر ؟؟
وليه الحلم متفسر ؟؟
وليه الفيلم وبمقاساتنا متفصل ؟؟
بطولة بتيجي بالصدفة … ومابنختارش
ويسندها بشر غلبان … يجوز أحسن … يجوز أطيب
يعيش كومبارس … ولا بيبانش
واحس بانه دور ظالم
مهوش ليه انا لوحدي … لكن للكل
واتبدل …
هموم ع الروح بتتكثف .. أبص لغيري واتأسف
ويهرب من حياتي الطعم
واقول من تاني لجل ارتاح
أهو نجرب … واعيش في الوهم
