بعد قصة حب قوية، أعلنت الفنانة المصرية إيناس عزالدين، نجمة Arab Idol، خبر حزين لجمهورها، وهو انفصالها عن زوجها الفنان أحمد قمر.
إيناس كتبت، على حسابها الخاص على موقع “الفيس بوك”: “بعلن انفصالي عن زوجي احمد قمر بكل حب و ود واحترام وتقدير ممكن نكون اختلفنا كأزواج اننا نكمل مع بعض او النصيب وقف لحد كده بس هيفضل صديق عمري كله.. بتمنالك كل خير وكل سعادة ونجاح يا احمد يا انضف انسان عرفته في حياتي.. كله قسمة ونصيب”.
الفنانة المصرية ردت على من اتهمها بالكذب وأن هذا الخبر ما هو إلا “كدبة إبريل”، بقولها: “معلومة دي مش كدبة ابريل ولا ده خبر هزار.. هو ليه الناس مش متقبلة فكرة اننا انفصلنا واحنا بنحترم بعض وبنحب بعض وشايلين لبعض الخير والتقدير واننا اختلفنا كزوجين واكيد القرار ده ما اخدناهوش وليد اللحظة وقبل ما نعلنه اتناقشنا كتير وقررنا ننفصل بالمعروف واحنا شايلين وفاكرين لبعض كل حاجة حلوة.. مش لازم نذم في بعض ونغلط في بعض وكل واحد فينا يقول التاني كان مطلع عينه علشان الناس تتقبل فكرة انفصالنا”.
أما عن أسباب الانفصال قالت: “احنا اختلفنا وصعب نكمل كزوجين بس مستحيل نبطل اننا نفضل في حياة بعض كأصدقاء لاننا طول عمرنا كنا اصدقاء حتى واحنا متجوزين والعشرة مش بتهون بالساهل ومش معنى اننا اختلفنا وانفصلنا كأزواج اننا نكره بعض ونغلط في بعض وما نشوفش بعض ونعادي بعض.. احنا هنفضل اهل غصب عن اي شيء وبنكن لبعض كل حب واحترام وتقدير”.
يذكر أن إيناس عزالدين تزوجت من أحمد قمر منذ ما يقرب 5 سنوات، بعد قصة حب طويلة جمعتهما، خلال اشتراكهما في الغناء بدار الأوبرا المصرية.
