فاروق يحيي، خبير ومسئول عن عدد من صفحات النجوم علي السوشيال ميديا وكان لنا هذا الحوار معه
ماهي بدايتك في الديجيتال ميديا ؟
بدايتي في الديجيتال ميديا كانت في 2013 و أول شغل رسمي ليا كان مع الفنان الكبير هاني شاكر . بعد مكاملة منه بيطلب مني تأسيس الديجيتال ميديا بتاعته و دي حاجه كبيرة جداً بالنسبالي و فخور بيها ..
كيف تعرفت علي هاني شاكر ؟
البدايه كانت لما عملت التراس هاني شاكر وقت برنامج صوت الحياة و كنت دايماً مع المجموعه اللي كانت معايا في الالتراس بنتواصل معاه عن طريق البرنامج و كانت أول مكالمه بيني و بينه قبل نهاية البرنامج بأيام و بعدها لقيت مكالمه منه بيطلب مني تأسيس الديجيتال ميديا الخاصه بيه و من يومها الحمد لله مستمرين مع بعض .
ما أكثر فنان تعتز بالعمل معه
بعتز جداً طبعاً بعملي مع الفنان هاني شاكر و الفنانة زينة
ماهي الصعوبات التي واجهتك في عمل الديجيتال ميديا ؟
الصعوبات كانت في البدايه بسبب ان كل يوم في جديد في المجال و كان لازم اكون مواكب لكل جديد فيه . علشان اكون قادر اقدم كل ما يطلب مني .
ما اكثر فنان تتمني العمل معه .
انا بحب فنانين كتير بس أحب اشتغل مع ياسمين صبري
هل عملك مقتصر علي الفن فقط؟
لا مش فن فقط . انا كنت مسؤول عن شغل شركة عقارات و مصورين و دكاترة لكن أغلب شغلي حالياً مع فنانيين مطربيين او ملحنين و شعراء او ممثلين
ما كواليس العمل في السوشيال ميديا وهل هو عمل صعب ومجهد ام لا ؟
الكواليس كتيرة جداً و طبعاً مفيش شغل مبيكنش فيه شويه مشاكل و عراقيل في الطريق بس الحمد لله بتعدي .
هو عمل سهل و صعب
سهل للي بيحبه و عايز يكون حاجه فيه و عارف هو محتاج ايه و العميل بتاعه عايز يوصل لفين
صعب للي داخل المجال علشان ياخد فلوس و بس هيلاقي نفسه وقف في نص الطريق ومش قادر يكمل .
اوقات كتير بيكون العمل مجهد و بيكون فيه تعب اعصاب و توتر خصوصاً مع كل عمل او مشروع جديد بكون مسؤول عنه
أخر عمل كنت مسؤول عنه ؟
انا كنت مسؤول مؤخراً عن الديجيتال ميديا لأحدث أغاني الفنان هاني شاكر هشكي لمين يا عيني و الحمد لله الاغنية حققت نجاح كبير علي السوشيال ميديا و في اقل من اسبوع كانت معديه مليون مشاهده .
ايه الصعوبات اللي بتواجهك في المجال ؟
في صعوبات بيكون سهل تتحل و صعوبات بتكون محتاجه شغل كتير و أهمها
الصفحات المزيفة اللي بتكون بأسماء فنانين و موثقه و هي مالهاش اي علاقه بالفنان
و دي بتحتاج شغل كتير علشان الفنان يرجعله حقه و ترجعله الصفحة لان الصفحات المزيفة دي بتعمل مشاكل كتيرة جداً للفنانين و مؤخراً أكتر من فنان كان بيعاني من انتحال شخصيته و الحمد لله قدرت ان الصفحات المزيفه تتقفل و يبداء يكون ليه تواجد رسمي و صفحات موثقه تحت ادارة الفنان نفسه .
ما خططك المرحلة المقبلة .
بتمني ان شاء الله اقدر خلال الفترة الجايه اكون شركتي
و اتوسع في مجالي اكتر
