أصدرت رابطة أولتراس “وايت نايتس” المساندة لنادي الزمالك، بيانًا للرد على قرار مرتضى منصور رئيس نادي الزمالك، بإغلاق مدرج الثالثة يمين، والذي كان دائمًا منصة الرابطة في المباريات لمساندة الفريق.
ونشرت الرابطة، عبر حسابها الرسمي على “فيس بوك”: “النهارده مش هنكتب بلغة عربية فصحى، ولا هنكتب مصطلحات محدش بيفهمها، هنخاطب الناس كلها بلغة يفهموها عشان يحسوا بكم المعاناة و الأسي اللي بيعيشه جمهور الكورة كل يوم.
إبتدت المهزلة دي بداية من قمع الجمهور ثم منعهم ثم حبسهم ثم قتلهم بدم بارد ثم هدم مدرجاتهم، و أخيرا بتقييدهم و تهديدهم و إجبارهم يقعدوا في مكان غير مكانهم.
التالته يمين المكان التاريخي لكل جمهور الزمالك، اللي بيجتمع فيه الغني و الفقير، الشاب و العجوز و الطفل، و العيله و الأم و كل الناس بكل صفاتهم و طبقاتهم الإجتماعيه بيتلاقوا هنا.
بيغنوا بصوت واحد و روح واحدة عشان حب إتربوا عليه من يوم ما إتولدوا.
تذكرة الماتش اللي كانت ب٥ جنيه و بعد كده ١٠ و ٢٠ و دلوقتي ب٥٠ جنيه، عمرها ما هتمنع شباب بيسافروا ورا فرقتهم لآخر مكان في الدنيا و في ظروف مايتحملهاش غيرهم هم بس.
القصة مش تالته ولا تانيه! الموضوع كله و تتقفل التالته ليه أصلا! و مين المستفيد من كده!
مش كفايه العالم كله بيلعب كل المسابقات بجمهور و يمكن ظروفهم أوحش مننا بمراحل، لكن عندهم إستعداد يبنوا و ينموا في الرياضة الشعبية الأولي في العالم، ده عقبالنا يعني.
وعود في وعود في وعود.
السيد وزير الشباب و الرياضة، و السيد رئيس لجنة الشباب مش جه دورهم عشان يعملوا شغلهم و يساعدوا الشباب، اللي دايما مستعد لحل مشكلة الجمهور و عودتها في أسرع وقت!
ولا الشباب دي كلمة بس كده، و هنجيب ٥-٦ تبعنا و الدنيا مستقرة و زي الفل.
مش هنعيب علي شخص مريض عنده مشاكل تقريبا من و هو طفل، لا يعلمها إلا الله يعني! و تبعياتها اللي خلتنا دايما في أزمات و مشاكل عشان عايز يثبت للناس إنه راجل، و كلنا عارفين اللي فيها يعني
العيب علي اللي عايز يحبس و يذل و يهدد، و في الآخر يطلع يقول شعارات عن بناء و تنمية الوطن، و دور الشباب.
الفكرة مش في المكان، الفكرة في اللي فاكرين إنهم هيحولوا المدرج سجن.
و إحنا كنا ولازلنا و سنظل خلف نادي الزمالك في أي مكان و زمان، لأن ده العهد اللي خدناه علي نفسنا و عمرنا ما هننقضه، المدرج بتاع الجمهور”.
