د.آمال إبراهيم …. تكتب السعاده الزوجيه

بقلم الكاتبة الصحفية د.آمال إبراهيم
تمر العلاقات بين الرجل والمراه بعده مراحل لابد من إدراكها ومعرفتها كويس علشان نعرف طبيعة كل مرحله وكيفية التعامل معاها.

*أول مرحلة:
مرحلة الانجذاب ( الانبهار ) :
وفي المرحلة دي بينبهر كل انسان بالطرف التاني … بيشوف كل ميزاته ويتغاضى عن عيوبه مش بيشوف العيوب اصلا،ودي المرحله اللي بتلمع فيها العيون … دي مرحلة حب الأفلام والمسلسلات التركي

مظاهر المرحله دي:
– لمعة وبريق العيون.
– ماسك الموبايل طول الوقت.
– الكلمات المعسوله

المرحله دي بيشوفوها الطرفين انها أجمل مراحل حياتهم … بيحسوا انهم طايرين من الحب والسعاده… وكل واحد فيهم بيظهر فيها انه ملاك ( مش تمثيل .. هو فعلا نفسه يسعد الطرفالاخر )

المرحله اللي فاتت دي تعتبر أسهل مرحله في العلاقه لكن بعد فتره منها بتيجي المرحله الأخطر والأهم

* مرحلة الصدمه:

وانا اسميها كده لان ده فعلا احساس أحد الطرفين أو الاتنين سوا.
بعد ما تنتهي مرحلة الانجذاب او يقل أثرها بينصدم الطرفين بظهور اختلافات ما بينهم (وده شيء طبيعي جدا).

كل واحد كان متخيل ان الشخص التاني متوافق معاه ونسي مشكلات الحياه واختلاف الطبائع البشريه واننا مش ملايكه.

بيظهر في المرحله دي عيوب كل طرف للتاني وبيحس ان الطرف التاني هو اللي اتغير.

وقت المرحله دي:
فترة الخطوبه لو طولت أو بعد فتره بسيطه من الزواج.

مظاهر المرحله:
– كل طرف مش طايق التاني.
– ندم على الاختيار.
– كل واحد شايف ان التاني اتغير او حبه قل.
– وأحيانا بيطلبوا الفسخ او الطلاق.

تحذير هام:
المرحله دي طبيعيه جدا وإياك انك تاخد فيها قرار غلط … لان كل انسان وله عيوبه … وكلنا مليانين أخطاء.

نصيحة المرحله:
كل شخص يحاول يتأقلم مع طبيعة الطرف الآخر ويتنازل علشانه وياريت بلاش تقفوا لبعض ع الواحده.
وماتقارنش بالمرحله الأولى الا علشان تعمل شيء جميل من اللي كنتوا بتعملوه قبل كده.

لما تعدي المرحله دي بالسلامه هاتدخل أسعد مرحله

* مرحلة التوافق والعشره:

ودي أحلى المراحل وأكثرها استقرارا … الحب الحقيقي هو التوافق بين الطرفين … والدائم بينهم هو حب العشره اللي مليان موده ورحمه.

في المرحله دي بيظهر بين الطرفين ود ومحبه … ألفه وطمأنينة… هدوء وسكينه.

كل طرف بيكون فهم طبيعة الاخر وتقبلها زي ما هي … حتى الأخطاء عرفها وتعايش معاها.

واللي وصل للمرحله دي أقدر اقوله انت نجحت جدا حافظ علي العلاقه بزياده الثقه والدعم للطرف الآخر واعرف ان عندك رصيد كافي لكن دائما نحتاج لتجديد عن طريق هديه صغيره خروجه غير متوقعه تذكرتين سينما أبوه حاجه بسيطه لكن أثرها كبير في نفسيته زوجتك جدا رساله وانت في شغلك تقولها وحشتني
ادخل دائما علي حياتك التجديد يساعد علي استمرار السعادة الزوجيه