حتة بحتة
كلمات الشاعر والكاتب عمرعبدالعزيز زهيري
ومن تاني بيغلبنا
علي الرغم إنه لا خدعنا …
ولا قال إنه مش هيعود
ولا ادي وعود
بأنه في يوم هيرحمنا وينسانا
Puzzle
متلخبطة بايظة وبنعيشها
وقابلينها
نشكل فيها نلقاها وغصب عنا تتلخبط
نقول ده قانونها أو دينها
وبنسلم ونتخيل ….
بأن الشكل ده هيدوم
رضينا بيه وأتمنينا بس يدوم
وفي الزحمة … وفي الجري علي العيشة وعلي اللقمة
نلاقي إنه يفاجئنا ويسرق من ال Puzzle حته
يشيل من عمرنا حته
عاشت ياما سنين فينا ونلقاها بقت ذكري
ونشغل نفسنا بال جاي
نواسي عجز مالكنا … وبنردد
سبحان من له الدوام الحي
نعزي نفسنا بالكدب … بكونها آخر الأحزان
علي الرغم إن أحزاننا مصاحبانا بطول العمر
علي الرغم إنه نهايتها نهاية عمر للأنسان
فيه حتة في ال Puzzle ناقصه نرقعها بـ100 حتة
لكن برضه بتوجعنا وناخد عالوجع والشكل
ونلجأ ليها.. لقانونها …نداوي في آلام العقل
ونتناسي..
بأنه راصدنا وناويلنا وهيجيلنا أكيد تاني
مصيره بسرعة أو بشويش
وإنه أكيد فيه حتة هتختفي تاني
نغض الطرف .. نستعبط ..عشان منعيش
