ذكريات المطر
بقلم الكاتب والشاعر عمر عبدالعزيز زهيري
وبفتكرك وبشتاقلك
في مطرة مغرقة الشارع
ومدخل بيت يلم قلوب
بتحضن بعض تدفي
في نور يرسم ضلال وشك
بلون نفسي علي الشباك
وييجي البرق في عينيكي ويسحبني
ياخدني ف ثانية ليكي هناك
في شجرة وحيدة بردانة
بغصن وجذع مترب
وشمس خريف
بتلمسني ابتدي أدفى
ولما ابص لعينيها بتتدارى وتتهرب
أنا لوحدي ومن غيرك ساكن دنيا بلا عناوين
يغيب صوت الفرح فيها ويفضل بس لحن حزين
بيوتها شكل من رسمك
شوارعها علي أسمك
ومهجورة ومن غير ناس
والاقي سلوتي في زحمة سؤال يائس بلا أحساس
ليه سبتيني هنا لوحدي
وخدتي معاكي كل خلاص ؟؟
وأهرب جوه أسئلتي واتخبي تغطيني
والاقيها بتشغلني تجيبني هناك توديني
وأتاريني …
أنا أهرب من حنيني إليكي
تقوم ترميني لحنيني
وألقي صوت بيتردد يصاحبني يسليني
ولما يعلي ويحشرج تبان لي الصحبة… دي أنيني
وأتبسم واستغرب
شفايف تدفن الضحكة
معاكي الضحك .. ما كانش بس من قلبي .. ده كان من كل
وجداني
واتوه وافوق وانا بسأل
هييجي يوم أكون تاني ؟؟
وأنا نايم
أشوف صورتك بحس بإن أنا عايش
ولما أصحي
أموت من حسرة ساكناني
وأفهم إني باتحرك وباتنفس
باشوف واسمع واشكر ربي واتأسف
وأنا عايش في ذكري كلها ألوان
أنا لوحدي خيال أو جسم من غير روح
وفي الذكري وفيها بس أنا إنسان
