مصطفى كامل سيف الدين …. يكتب المصرى حافظ مش فاهم

بقلم الكاتب الصحفى مصطفى كامل سيف الدين

مجتمع حافظ مش فاهم ..ياريت متحكمش علي حد ..
ياريت متحكمش علي حد من المظهر ، متحكمش علي حد من اللي سمعته عنه ، متحكمش علي حد من اللي تخيلته في دماغك ليه.
متحكمش مثلا علي حد انه بيلبس وحش وانت لبسك نضيف ، مايمكن من جواه هو انضف منك والعبرة بالجوهر مش بالمظهر علي فكرة.

متحكمش علي حد انه مبيصليش مثلا عشان بتشوفه بيشتم او بيعمل معاصي كتير ، ماهو ممكن يكون بيصلي عشان ربنا يغفرله المعاصي دي.
متحكمش علي حد انه طيب ومعندوش كرامة انه سايبك ومبيعاتبش سعادتك ، هو ممكن يكون سايبك عشان بيحبك ومقدرك وجاي علي نفسه عشانك وانت برده مش مقدر ده. !!
عادي اصلك بكره هتندم والله.
متحكمش علي حد انه ضعيف ومش صايع وبتاع شلة فاسدة وخانقنا بجملة انا ولد
آه زيك كدة فانت فاكر انه بيسيب حقه ، لأ هو راجل ومبيسبش حقه برده بس مش عايز يبقي صايع او فاسد بمعني اصح زيك كدة عشان بس يرضي ربنا عليه
متحكمش علي حد انه لخمة ومبيقدرش يتكلم قدام بنات وناس شخصيتها قوية عليه !! عادي هو آصلا ماخدش الفرصة دي عشان يبقي جامد فشخ زيك.
متحكمش علي حد انه فاشل ومبيذاكرش ومالوش مستقبل واضح من دلوقتي ، لأ هو ممكن يكون بيذاكر و اكتر منك كمان بس ربنا ممكن يكون مش حابب يوفقه دلوقتي وشايله مجهوده لوقت تاني ..
فربما خيرا لم تنله كان شرا لو أتاك.
“وإنا لانضيع اجر من احسن عملا”صدق الله العظيم..
ضيع ربع ساعة من وقتك وأدخل اقرا في علم النفس وهتلاقيه بيقول عن كدة صدقني.
ومتخافش ، الفرص بقت أكتر من الناس دلوقتي تقريبا ، فيه اللي بيضيعها ومش فارق معاه وده سوري من أغبي خلق الله.
وفيه اللي بيستغلها وده ربنا بيساعده عشان بيحاول يبقي أحسن بس مش عارف، بس آكيد هيبقي آحسن.!
متحكمش علي بنت راجعة البيت الساعة 6 الصبح انها رقاصة ، ما ممكن تبقي ممرضة وشغلها بيخلص في الوقت دة.
متحكمش علي بنت ماشية في الشارع مع راجل انها شمال عشان ممكن يبقي أخوها او قريبها او حتي زميل ليها بيوصلها لأنه خايف عليها زي آخته مش اكتر !
انتوا مدخلتوش جوا نواياهم يامجتمع حافظ مش فاهم.
متحكمش علي واحده انها تخينة آوي ، مايمكن دة مرض عندها يا آخي وانت بتجرح شعورها.
متحكمش علي الراجل بيلم الزبالة اللي في الشارع انه زبال، لأ انت اللي زبال لأن هو اللي بيلم وانت اللي بترمي.
ببساطة كدة ..
متحكمش علي حاجة من مظهرها ..
لازم تعرف ان الجوهرة اصلها فحم واي انسان جميل آصله طين.
خلي عندك حسن الظن دايما ..
دة حتي حسن الظن من العبادة ياأخي ، حسن الظن من العبادة يا آنسة.
يارب نفهم ونبطل نكلم ونحكم على بعض من غير مانعرف بعض