شكلك انا
كلمات الشاعر عمر عبدالعزيز زهيري
حاجات كتير منحسهاش
لكن ساعات
تبهت و تظهر عالوشوش
أصل الحكايه بتترسم
و بتتوشم
و لابد أنه تسيب و لو حتى رتوش
مهما دارينا بين دهاليز عمرنا
بتجينا لحظه فيها تتسرب تبان
لحظه بتلمس قلبنا تنده زمان و ننسحب و نروح هناك
تظهر أثار لجرح عشناه و افتكرنا انه راح
اتاريه مهواش جرح واحد
لأه جراح متنطوره ماليه الحواس تصحى و بتصحى معاها فينا من تانى الحنين
اللى كبر بعد الفراقو استقوى من بعد اما كان لساه جنين
و تبصى عالشكل تشوفى حاجه باينه فى العنين
شارع قديم
كرسى فى قهوه
طعم المطر
ريحه الدفا
شرخ فى ازاز ،أو امنيه
أو حته ناقصه فى أغنيه
لمسه ايدينا لما كانت تيجى سهوه
دمعه و ضحكه ذكريات حب و أنين فجأه بيظهر كل اللى راح و فات
أتارى انه لسه موجود مستخبى
ما بين زمن رافض يعيشه
و بين خيال لحلم كان افتكره مات
و تمر اللحظه و نرجع تانى للشكل الغريب
نفضل نكمل فى الحياه و مع البشر
نصرخ و نندم نبتسم
و نحن تانى و نترسم
بالشكل اللى بيوشى انه لسه جوانا هناك
فيه طيف حبيب .
