رقصه بالعكس
كلمات الشاعر عمر عبدالعزيز زهيري
امال احلام في بنوره
بترقص بينا جوه النيل
وفجاه بتتولد صوره
لحلم هزيل
ينازع في صدور الكل
بيترجرج بمزيكا
وترها من أمل مهزوم
رتوش مسحوقه كدابه
تغطي عالوشوش بالكوم
لكن بيبان
بأنه في القلوب فيه شرخ
وبسمتنا ماهيش كامله
بنرقص اه لكن بالعكس
حروف جوه الكلام ناقصه
معاني كتير
ولحن في نوته ما بتكملش
آمال متكسره بتتهز
بواقي حوالينا تطير
بنملا الكاس باوجاعنا
ونرشف منه طعم الاه
وتتسحب وتتداري
وهي خارجه في الدخان
واحضان بارده تتنوتر
وحب بطعم الاستهجان
وفجأه النور بيتفجر
نخاف ان الوجع هيبان
نلاقي وشوش ما نعرفهاش
تلم فوهم عمال منها يتسرب
قلوب وارواح بتتعري
وتتدفي بحتة شاش
وبنروح
وننسي الليله بالأحزان
ويسكن فينا من بكره
الم حيران
ماهوش لاقي فقلوبنا مكان.
