كلمات الكاتب والشاعر عمر عبدالعزيز زهيري
رجلين ضعيفه صغيرين
تعدي مالعتب للطين
ومطره بارده ما بترحمش
وريح عازفه للحن حزين
ودكان ضلمه عالناصيه
ما هوش فاتح ولا قافل
لكن عارض
أنين وسنين
وكرتونه لبن عايمه
يدوسها لجل ما يعدي
وهو يدوسه…
بني آدمين
قلوب من صلب وبتحكي
وبتصلي علي المساكين
بيحضن جامد الجرانين
مع شوية دفا فاضلين
يتبت فيها كما امه
ومن صغره
تبان هي اللي بتغطيه..و بتضمه
تزيد الريح
تغطي صوت ندا تايه
” صباح الخير آخر ساعه”
يرد الصوت صدي وهنان
لحلم كسيح
وبيشد المطر والريح
وحبر يسيح
علي يده
بيمسح وشه
يلقي انه
كلام غطي عينيه و خده
ويستسلم
وبتطير في الفضا كلمات
ويتبعتر في شارعنا
حروف و وعود
وصوره كبيره لكبيرنا
وابتسامات
ويفضل طفل بيدور
وبرد فروحه بيعور
جنين لحلم متقيد
ولما يعوز يفك القيد
بيلقاه اتولد ميت.
