أبكم في الأحلام
كلمات الشاعر عمر عبدالعزيز زهيري
ودلوقتي
وأنا واقف كما طفل في زحام الدنيا ، أمه نسيته
وسط البشر
غريب ولساني مش منهم
برئ محاوطني الخطر
وأسراري
أنا معاكي كلام مكشوف
بقيت صفحات ومطوية
بياض وسطور مافيهش حروف
وماليني شعور بالخوف أنا اللي كنت “امه” للصحاب والناس
بقيت بعدك
ببص عالكسوف بكسوف
أنا حاسس إني ناسي قبل منك كنت مين
إسمي فصلي جاي منين أو رحت فين
جوه حضنك
عيشتي كل دنيتي .. ومكان ميلاد
وقت لما كان لي أم وكان لي أب وكان لي بيت
بره حضنك
طفل تايه أبكم الأحلام لقيط
وبترجي مع الذكري
يكون لي عمر من تاني
يتيم ماشي بيتحرك ويتنفس .. ويتكلم
لكن ميت
طريد من دنيا حبتها
وهُنت عليها تنساني
