بيان أخير
كلمات الشاعر عمر عبدالعزيز زهيري
بتتوهي ليه وبتسرحي …
ماهو برضه بعد سنين … وإنتي في الظلام متكتفه
هتزوغ عنيكي .. لما فجأة تفتحي
وطبيعي ضهرك يوجعك
يلا إفرديه إياكي تاني توطي …. إوعي تريحي
وخلي بالك تبتي فحريتك
حاسبي عليها .. ده أنتي قهر مودعك
بتشدي سجانك وغل بيشغلك
عن ألف إيد بتشد فيكي تمزعك
محتاجة إيه في الوقت ده ؟؟؟
ومنين يجيكي العقل … يهرب ينفلت
لما يلاقيكي محكمة فيكي الهوي والأفئدة
خايف عليكي من اللي فات .. ومن اللي جاي
ورعبي منك لما بتحسي برضا
إذا أمس ده كان مش بإيدك خلي بالك وإحذري
من النهاردة .. عُرضه إنك تندمي ..
أمانة تهدي إتمهلي
إتزوقي وحِلي شعرك في الفضا
ودوقي طعم النصر من فنجان في قهوة صغيرة
بتضم ناسك وأسمعي لهم
عيشي طعم الفضفضة
وخدي ولادك جوه حضنك ..طمنيهم و إوعي تاني تفرقي
و دوقيهم لجل ما يحسوا بأمان
خلي العيال من تاني تلعب في الحارات .. ألعاب زمان
وتبقي سيرة الحب دايرة في البيوت
وخلي طيبتك تحكمك .. إن كان و لازم لك طاغوت
وسامحي وانسي
إزاي وإنتي اللي اتظلمتي بقيتي قادرة تظلمي !!!!
ساعتها حاتشوفي إن بكرة بيترسم في عيون وليد
نفس اللي يوم كان شكله نني الشهيد
هتفخري وتبتسمي
إنك في قمة ثورتك … بطلتي أهوه تتألمي … ولسه قادرة تحلمي
